BRING LIACHT IN D'ZEIT
De Zeit, de ma de "staade" nennt,
steht jetzad vor da Dia.
Des hoaßt ned, daß ma hetzt und rennt!
Was zähln daad, waar as Gspia!
Daßd wieder moi a Liacht ozündst,
des d'Dunkelheit erhellt,
damit an andern Menschen findst,
den 's Lebn in' Schatten gstellt.
A Zeit, woma se wieder bsinnt,
ned an se selber denkt,
weil der alloa de Liab erst gwinnt,
der aa a Liab vaschenkt!
Da braucht's koa Geld, koa Kostbarkeit,
koan foischen Glimmerglanz.
Dafia waar 's da, de staade Zeit....
Vagiß ihrn Sinn ned ganz!
- Autor unbekannt-